هل الإسلام مسئول عن تخلف المسلمين؟

حيا الله اخوانى واخواتى , ومرحبا بضيوفنا الباحثين عن الحق .

فى شبهة دلوقتى بقت لبانة فى بق اعداء الدين , ييجى الواحد منهم وهو نافخ صدره , ويقول " مسلمين ايه وبتاع ايه , مانتو التخلف الى انتوا فيه سببه الإسلام " !!! كأنه عمره ما سمع عن تاريخه المسيحى منذ القدم الى كانت الناس فيه بتقطع بعضها بسبب الجهل الى كان بيسود بلادهم .

1- حقائق التاريخ بتبين بما لا يدع مجالاً للشك , إن الإسلام قدر بعد فترة زمنية قصيره من ظهوره , إنه يقيم حضارة رائعة كانت من اطول الحضارات عمراً فى تاريخ الكرة الأرضية . ولسة الشواهد موجودة للبشر باللى سابه المسلمين من علم غزير فى شتى مجالات العلوم والفنون , ومكتبات العالم بتضم الآلاف مؤلفة من المخطوطات العربية والإسلامية , بتبرهن على مدى ما وصل ليه المسلمين من حضارة عريقة , ضيفوا على كدة الآثار الإسلامية المنتشرة فى كل العالم الإسلامى , وإللى بتشهد على عظمة إللى وصلت ليه الفنون والعلوم الإسلامية .

وحضارة المسلمين فى الأندلس , وإللى اتبقى من معالمها , لغاية ساعتنا دى بتشهد على كدة فى أوروبا نفسها, واللى ميعرفوش عدو الدين إن أوروبا قامت بحركة ترجمة نشيطة لعلوم المسلمين فى القرنين الثانى عشر والثالث عشر , وكان هو ده الأساس إللى بنت عليه أوروبا حضراتها الحديثة , وراجعوا كتب التاريخ يا من تدعون الحضارة .

2 - القرآن الكريم بيشتمل على تقدير كبير للعلم والعلماء , وحث على النظر الى الكون ودراسته , وعمارة الأرض. وأول خمس أيات نزلوا على سيدنا محمد صلى الله عليه وسلم من الوحى الآلهى , بتنبه لأهمية العلم والقراءة والتأمل ( اقرأ باسم ربك الذى خلق - 1- خلق الإنسان من علق -2- اقرأ وربك الأكرم -3- الذى علم بالقلم - 4- علم الإنسان ما لم يعلم ) ( سورة العلق 1 - 5 ) والموضوع ده كانت ليه دلالة مهمة انتبه ليها المسلمين من البداية .

3- تخلف المسلمين النهاردة, الإسلام مالوش دعوة بيه ولا يتحمله , لإن الإسلام ضد كل أشكال التخلف , ولما المسلمين إتخلفوا عن إدراك ومعرفة المعانى الحقيقة للإسلام , اتخلفوا برضه فى ميدان الحياة . ( مالك بن نبى - المفكر الجزائرى الراحل ) عبر تعبير صادق لما قال : " إن التخلف الذى يعانى منه المسلمون اليوم ليس سببه الإسلام ، وإنما هو عقوبة مستحقة من الإسلام على المسلمين لتخليهم عنه لا لتمسكهم به كما يظن بعض الجاهلين ." مافيش أى صلة بين الإسلام وتخلف المسلمين .

4 - لسة الإسلام وهيفضل منفتح على كل تطور حضارى بيشتمل على الخير للإنسان , ولما المسلمين يدوروا على الأسباب الحقيقية لتخلفهم , مش هيلاقوا الإسلام فى الأسباب دى , ففيه أسباب خارجية بيرجع جانب كبير منها لمخلفات عهود الإستعمار , إللى وقفت أدام البلاد الإسلامية , ومخلوش ليها أى دور فى إنها تعمل حركة إيجابية , بلإضافة لبعض الأسباب الداخلية , أدى بدوره إن المسلمين ينسوا العناصر الإيجابية الدافعة لحركة الحياة فى الإسلام .

5 - مينفعش إن احنا نخلط بين الإسلام والواقع المتدنى ده للعالم الإسلامى المعاصر , فالتخلف إللى بيعانى منه المسلمين ده مرحلة فى حياتهم , وده مبيعنيش بإى حال من الأحوال إنهم هيفضلوا كدة لغاية نهاية التاريخ , ومينفعش إننا نتهم الإسلام بأنه ورا التخلف ده , زى برضه مينفعش إن احنا نتهم المسيحية بإنها ورا تخلف دول أمريكا الاتينية .

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ (16)

وآخر دعوانا أن الحمد لله رب العالمين